اور اللہ تعالیٰ کا فرمان ہے:﴿اَمْ یَحْسَبُوْنَ اَنَّا لاَ نَسْمَعُ سِرَّہُمْ وَنَجْوَاہُمْ بَلٰی وَرُسُلُنَا لَدَیْہِمْ یَکْتُبُوْنَ﴾’’یا وہ گمان کرتے ہیں کہ بے شک ہم ان کا راز اور ان کی سرگوشی نہیں سنتے، کیوں نہیں اور ہمارے بھیجے ہوئے ان کے پاس لکھتے رہتے ہیں ۔‘‘[الزخرف۸۰]اور اللہ تعالیٰ کا فرمان ہے:﴿حَتّٰٓی اِذَا جَآئَ اَحَدَکُمُ الْمَوْتُ تَوَفَّتْہُ رُسُلُنَا وَ ھُمْ لَا یُفَرِّطُوْنَ ﴾۔[الانعام ۷۱]’’یہاں تک کہ جب تم میں سے کسی ایک کو موت آتی ہے اسے ہمارے بھیجے ہوئے قبض کر لیتے ہیں اور وہ کوتاہی نہیں کرتے۔‘‘اوراللہ تعالیٰ کا فرمان ہے:﴿وَ لَوْ تَرٰٓی اِذْ یَتَوَفَّی الَّذِیْنَ کَفَرُوا الْمَلٰٓئِکَۃُ یَضْرِبُوْنَ وُجُوْھَھُمْ وَ اَدْبَارَھُمْ ﴾ [الانفال۵۰]’’اور کاش! تو دیکھے جب فرشتے ان لوگوں کی جان قبض کرتے ہیں جنھوں نے کفر کیا، ان کے چہروں اور پشتوں پر مارتے ہیں ۔‘‘اور اللہ تعالیٰ کا فرمان ہے:﴿وَ لَوْ تَرٰٓی اِذِ الظّٰلِمُوْنَ فِیْ غَمَرٰتِ الْمَوْتِ وَ الْمَلٰٓئِکَۃُ بَاسِطُوْٓا اَیْدِیْھِمْ اَخْرِجُوْٓا اَنْفُسَکُم﴾ ۔ [الانعام ۹۳]’’ اور کاش! تو دیکھے جب ظالم لوگ موت کی سختیوں میں ہوتے ہیں اور فرشتے اپنے ہاتھ پھیلائے ہوئے ہوتے ہیں ، نکالو اپنی جانیں ۔‘‘اس طرح کی مثالیں قرآن کریم میں بہت زیادہ ہیں ۔ان میں سے بعض سے یہ معلوم ہوتا ہے کہ اللہ تعالیٰ نے ملائکہ کے جو اوصاف بیان کئے ہیں ؛ وہ اس علم ضروری کو واجب کرتے ہیں کہ ملائکہ ویسے نہیں ہیں جس طرح یہ لوگ گمان کرتے ہیں کہ یہ صرف عقول نفوس میں ہوتے ہیں ۔ خواہ یہ کہتے ہوں کہ عقول دس قسم پر ہے اور نفوس نو قسم پر ہے۔ یہ تقسیم ان کے ہاں مشہور و معروف ہے[1]۔[1] مسلمان فلاسفہ نے اپنی اکثر کتابوں اور رسائل میں کہا ہے کہ: بیشک آسمانی عقول کو ملائکہ کہا جاتا ہے۔ دیکھیں : سیاست مدینہ از فاریابی ص ۹۔ اقسام العلوم العقلیۃ از ابن سینا ۱۳۔ یا اس کے علاوہ کوئی عقیدہ رکھتے ہوں ۔ ایسے ہی ملائکہ وہ قوت عالمہ بھی نہیں ہے جو نفوس میں کام کرتی ہے؛ جیسا کہ یہ لوگ عقیدہ رکھتے ہیں ۔ بلکہ حضرت جبریل علیہ السلام وہ فرشتہ ہیں جو رسولوں سے جدا ہیں ۔ وہ اللہ تعالیٰ کا کلام سنتے اور پھر اسے لے کر رسول اللہ صلی اللہ علیہ وسلم پر نازل ہوا کرتے تھے۔ اس پر کتاب اللہ ؛ سنت رسول اللہ صلی اللہ علیہ وسلم اور مسلمانوں کا اجماع دلالت کرتے ہیں ۔ اس کے عین برخلاف فلاسفہ جبریل امین کو عقل فعال یا ان خیالی صورتوں اور کلام الٰہی سے تعبیر کرتے ہیں ، جن کا گزر سرور کائنات صلی اللہ علیہ وسلم کے قلب و دماغ پر ہوا کرتا تھا؛ جیسے سویا ہوا آدمی خواب میں طرح طرح کی چیزیں دیکھتا ہے۔جو شخص رسول اﷲ صلی اللہ علیہ وسلم کے ارشادات عالیہ سے کلیۃً آگاہ ہے، وہ فلاسفہ کی ضلالت و جہالت سے آشنا ہے، اور بخوبی جانتا ہے کہ وہ کفار یہود و نصاری کی نسبت ایمان[اور رسول اللہ صلی اللہ علیہ وسلم کی اتباع ] سے بعید تر ہیں ۔یہ مسئلہ کئی جگہ پر تفصیل سے بیان ہوچکا ہے۔ یہاں پر مقصود وہ جامع کلام پیش کرنا ہے جس سے ان امور کی معرفت حاصل ہوسکے جن مسلمانوں کے عقائد اور اختلاف کی طرف اس رافضی نے اشارہ کیا ہے۔