عمر عائشہ رضی اللہ عنہا بوقت رخصتی نو یا انیس سال ؟

تحقیقی مقالہ

وجہ تخلیق کائنات سیاح افلاک جناب رسول پاک ﷺ کی سیرت اسوۃ حسنہ پر اعتراض کرنا اور کجی نکالنا دشمنان اسلام کا پرانہ وطیرہ رہا ہے اور جب بھی ان لوگوں نے یہ ناپاک حرکت کرنے کی کوشش کی ہے تو وہ تھوک پلٹ کر ان ہی کے منہ پر پڑا ہے۔ گزشتہ کچھ عرصہ سے کبھی لبرلز کی طرف سے تو کبھی سیکیولرز کی طرف سے ، کبھی ہندوؤں کی طرف سے تو کبھی عیسائیوں کی طرف سے ام المؤمنین سیدتناعائشہ صدیقہ طیبہ طاہر رضی اللہ عنہا کے مبارک نکاح اور رخصتی کی عمر کو لے کر اعتراضات کرتے نظر آرہے ہیں حال ہی میں ہندستان کی حکومت کی ایک ملعون عورت نوپور شرما نے بھی یہی مغلظات بک کر اپنی اصلیت بتادی اس کے بعد ہمارے کچھ کچے ذہن کے مسلمانوں کے ذہن میں سوالات اٹھتے ہیں اور تشفی بخش جوابات نا ملنے کے بعد وہ سوالات وہم اور وسوسہ کی شکل اختیار کرتے ہیں اور انہی اوہام وساوس کا فائدہ اٹھاتے ہوئے موجودہ لبرلز و سیکیولرزان سادہ لوح مسلمانوں کو دین سے بیزار کرنے میں لگ جاتے ہیں جس کے نتیجے میں بعض اوقات ہمارے بھولے بھالے مسلمان ان کے بچھائے ہوئے جال میں پھنس جاتے ہیں۔
 جواب کی طرف جانے سے پہلے عرض کرتا چلوں کہ یہ سیدہ عائشہ صدیقہ رضی اللہ عنہا کا نبی اکرم صلی اللہ علیہ وسلم کے عقد میں آنا، تمام امتیوں کی امی جان بننا یہ سب اللہ پاک کی طرف سے انتخاب تھا خود نبی اکرم ﷺ کی اپنی خواہش نا تھی جیسا کہ بخاری شریف میں روایت ہے کہ

عن عائشة رضي الله عنها أن النبي صلى الله عليه وسلم قال لها أريتك في المنام مرتين أرى أنك في سرقة من حرير ويقول هذه امرأتك فأكشف عنها فإذا هي أنت فأقول إن يك هذا من عند الله یمضہ

ترجمہ : 
حضرت عائشہ رضی اللہ عنہا سے مروی ہے کہ نبی کریم صلی اللہ علیہ وسلم نے فرمایا تم مجھے دو مرتبہ خواب میں دکھائی گئی ہو۔ میں نے دیکھا کہ تم ایک ریشمی کپڑے میں لپٹی ہوئی ہو اور کہا جا رہا ہے کہ یہ آپ کی بیوی ہیں ، ان کا چہرہ کھولئے۔ میں نے چہرہ کھول کر دیکھا تو تم تھیں ، میں نے سوچا کہ اگر یہ خواب اللہ تعالی کی جانب سے ہے تو وہ خود اس کو پورا فرمائے گا۔

صحیح بخاری حدیث نمبر : 3895 کتاب مناقب الانصار 

جب یہ عقد نکاح تھا ہی رب عزوجل کی طرف سے تو اس کے بعد کم سے کم کسی مسلمان کیلیے یہ وہم و وسوسہ رکھنا کہ یہ بے جوڑ تھا حضور صلی اللہ علیہ وسلم کی عمر مبارک 53 سال اور حضرت عائشہ صدیقہ رضی اللہ عنہا کی عمر 9 سال تھی یہ ظلم اور انسانیت کے خلاف تھا، اپنے ایمان کو ضائع کرنے کے مترادف ہے، یہ عین مشیت الہی کے مطابق ہی ہے اور اس کا کوئی عمل حکمت سے خالی نہیں ہوتا ظاہری حکمت و علت میں بعد عرض کرتا ہوں، اس سے پہلے ضروری یہ ہے کہ ان ناپاک ارادوں پر کچھ تحقیقی اور تنقیدی نظر ڈالنی چاہیے ۔

مؤرخین کی رائے
 
کتب تاریخ کا مطالعہ اگر کیا جائے تو حضرت عائشہ صدیقہ رضی اللہ عنہا کی بڑی بہن سیدہ اسماء بنت ابی بکر رضی اللہ عنہا طویل العمر صحابیات میں سے ہیں۔ عبداللہ بن زبیر رضی اللہ عنہ کی والدہ محترمہ ہیں۔ بڑی خدا رسیدہ عبادت گزار اور بہادر خاتون ان کی عمر تمام مورخین نے سو سال لکھی ہے۔ سیدہ عائشہ صدیقہ رضی اللہ عنہا ان سے دس سال چھوٹی ہیں۔ سیدہ اسماء حضرت عبداللہ بن زبیر ؓ کی شہادت کے پانچ یا دس دن بعد فوت ہوئیں۔ سن وفات 73ھ ہے۔اس حساب سے سیدہ اسماء ؓ کی عمر ہجرت کے وقت 27 سال ہوئی اور سیدہ عائشہ صدیقہ رضی اللہ عنہا ان سے دس سال چھوٹی ہیں تو آپ کی عمر ہجرت کے وقت 17 سال ہوئی اور سن دو ہجری میں رخصتی ہوئی تو اس کے مطابق رخصتی کے وقت 19 سال عمر بنتی ہے نا کہ 9 سال۔۔
جیسا کہ البدایہ والنہایہ میں ہے

اسلمت اسماء قديما وهم بمكة في اول الاسلام... وهي آخر المهاجرين والمهاجرات موتا. وكانت هي اكبر من اختها عائشة بعشر سنين.. بلغت من العمر ماته سنة.

اسماء  مکہ میں اوائل اسلام میں مسلمان ہوئیں۔ مہاجرین مردوں عورتوں میں سب سے آخر فوت ہونے والی ہیں۔اپنی بہن سیدہ عائشہ رضی اللہ عنہا سے دس سال بڑی تھیں“۔

( البدايہ والنهايہ 8 / 346 طبع بيروت)

اسی طرح تھذیب والتھذیب میں ہے

اسلمت قديما بعد اسلام سبعة عشر انسانا... ماتت بمكة بعد قتله بعشره ايام وقيل بعشرين يوماً و ذلك في جمادی الاولى سنة ثلاث وسبعين۔

مکہ معظمہ میں سترہ آدمیوں کے بعد ابتدائی دور میں مسلمان ہوئیں۔۔۔اور مکہ مکرمہ میں اپنے بیٹے (عبداللہ بن زبیر رضی اللہ عنہ ) کی شہادت کے دس یا بیس دن بعد فوت ہوئیں اور یہ واقع ماہ جمادی الاولی سن 73ھ کا ہے۔

علامہ ابن حجر عسقلانی، تهذيب التهذيب 12 ص 426 طبع لاهور، الامام ابو جعفر محمد بن حریر طبری، تاریخ الامم والملوک ج 5 ص 31 طبع بیروت، حافظ ابو نعیم احمد بن عبدالله الاصبحانی م 1430ھ، حلية الولياء وطبقات الاصفياء 2 ص 56 طبع بيروت

مزید حوالہ جات

اسلمت قدیما بمكة وبايعت رسول اللہ صلی اللہ علیہ و آلہ و سلم.. ماتت اسماء بنت ابی بکر الصديق بعد قتل ابنها عبداللہ بن الزبير وكان قتلہ یوم الثلثاء لسبع عشرة ليلة خلت من جمادى الأولى سنة ثلاث وسبعين.

سیدہ اسماء بنت ابو بکر صدیق رضی اللہ عنہ مکہ معظمہ میں قدیم الاسلام ہیں۔ آپ نے رسول اللہ کی بیعت کی۔اپنے بیٹے عبداللہ بن زبیر ؓ کی شہادت کے چند دن بعد فوت ہوئیں۔ عبداللہ بن زبیر رضی اللہ عنہ کی شہادت بروز منگل 12 جمادی الاولی 73ھ کو ہوئی۔

 محمد ابن سود الكاتب الواقدی 168ه م 230ه الطبقات الكبرى ج 8 / 255 طبع بيروت

كانت اسن من عائشة وهى اختها من ابيها . . ولدت قبل التاريخ لسبع وعشرين سنة. 

سیده اسماء ؓ، سیدہ عائشہ رضی اللہ عنہا سے زیادہ عمر کی تھیں۔ باپ کی طرف سے سگی بہن تھیں۔ ہجرت سے 27 سال قبل پیدا ہوئیں۔

(امام ابن الجوزی، اسدالغابہ في معرفتہ الصحابہ ج 5 ص 392 طبع ریاض)

اسلمت قديما بمكة قال ابن اسحق بعد سبعة عشر نفسا .. بلغت اسماء مائة سنة ولدت قبل الهجرة لسبع وعشرين سنة.

سیدہ اسماء رضی اللہ عنہا مکہ مکرمہ میں ابتدائی مسلمان ہوئیں۔ابن اسحاق نے کہا سترہ انسانوں کے بعد, سو سال عمر پائی ہجرت سے 27 سال پہلے پیدا ہوئیں‘‘۔

الاصابة في تميز الصحابة 4 ص 230 م 773ھ، سيرة ابن هشام م 1 ص 271 طبع بیروت،،

الكامل في التاريخ 4، ص 358 طبع بيروت، علامه ابوعمر یوسف ابن عبدالله بن محمد بن عبد القرطبی 363ھ، الاستيعاب في اسماء الاصحاب على هامش الاصابة 463ھ ج 4 ص 232 طبع بیروت

اسی تحقیق کی تائید متفق علیہ وہ احادیث بھی کرتی ہیں کہ سیدہ عائشہ صدیقہ رضی اللہ عنہا جنگ بدر اور احد میں شریک تھیں ۔ جنگ احد کے موقع پر آپ ام سلیم کے ہمراہ پانی کے مشکیزے اٹھائے مسلمانوں کو پانی پلاتی پھر رہی تھیں

 (بخاری کتاب الجہاد و السیر، باب غزوالنساء وقتالصن مع الرجال)

یہ تائید اس طرح ہو گی کہ اگر ہجرت کے وقت بیبی پاک کی عمر 9 سال تھی تو جنگ بدر اور احد میں 10 اور 11 سال کی عمر ہونی چاہیے، اور اتنی کمسن لڑکی کو نبی پاک صلی اللہ علیہ وسلم میدان جنگ میں آنے کی اجازت ہر گز نا دیتے جبکہ 15 سال سے چھوٹے لڑکوں کو جنگ میں آنے سے منع فرما چکے تھے، تو ایک کمسن لڑکی کو کیسے اجازت عطا فرما سکتے ہیں۔
اس تحقیق سے معترضین کو جواب تو کافی اور وافی مل جائےگا لیکن دو اعتبار سے یہ جواب نا قابل قبول ہے۔ 
 اولا
دراصل حضرت عائشہ اور حضرت ام سلمہ رضی اللہ عنھما کی عمر کا فرق تاریخی کتب کے حوالے سے بیان کیا گیا ہے کہ دس سال کا فرق ہے اور عبارت 

وكانت هي اكبر من اختها عائشة بعشر سنين

حالانکہ اصل عبارت میں عشر کی جگہ عشرین ہے جس کا مطلب کہ دونوں بہنوں کی عمر میں بیس سال کا فرق ہے اور جب بیس سال کا فرق ہوگا تو نکاح کے وقت حضرت عائشہ رضی اللہ عنھا کی عمر 9 سال ہی بنتی ہے ، جو کہ کتب احادیث سے صحیحہ اسناد سے ثابت ہے تو جو توجیہ موجود بھی اور احادیث صحیحہ کے موافق بھی ہے یہی توجیہ قبول کی جائے گی ورنہ منکرین حدیث ہر اس حدیث کو ماننے سے انکار کر دیں گے جو ان کے مزاج و عقل کے خلاف ہو اور اپنی من چاہی تاویلات و توجیہات کر یں گے اور اس طرح انکار حدیث کا دروازہ کھولنا اسلام کی بنیادوں کیلیے انتہائی خطرناک ثابت ہو گا اور کئی نئے فتنوں کیلیئے دروازہ کھولنا ثابت ہوگا اس کی ایک مثال اس کے تحقیق کا اگر تقابل احادیث مبارکہ سے کیا جائے تو یہ جواب نا صرف کمزور بنتا ہے بلکہ اس کے ساتھ ساتھ دین کی بنیادوں پر بھی ضرب پڑتی ہے وہ کیسے؟
حال ہی میں ایک اہلسنت کے بہت بڑے نام نے اس حدیث پر کلام کرتے ہوئے فرمایا کہ بخاری شریف نبی اکرم صلی اللہ علیہ وسلم کے وصال کے دو سو سال بعد لکھی گئی ابھی میں کچھ بات کہوں آپ سنیں اور کچھ دنوں بعد وہ آگے کسی سے کہیں لازمی کچھ نا کچھ بیان میں تبدیلی ہوگی اور جب وہ آگے کہے گا تو لازمی کچھ اور تبدیلی ہوگی۔
مجھے یہ سن کر بہت زیادہ حیرت ہوئی کہ شاید ان حضرت نے تدوین حدیث کے مراحل و مراتب اور اصول حدیث کے تحت جو رواۃ اور مرویات کی شرائط ، احتیاط موجود ہیں وہ پڑھی بھی ہیں یا نہیں ؟ کیا یہ جواب دینے کے بعد آپ بجز بخاری شریف کہ کسی بھی حدیث کی کتاب کو دلیل کے طور پر پیش کر سکتے ہیں ؟ یقینا نہیں کر سکتے اس کا صاف اور سیدھا مطلب یہی ہے کہ جو لوگ خود کو اہل
قرآن کہہ کر حدیث کا انکار کرتے ہیں آپ ان ہی کی زبان بول رہے ہیں خدارا ہوش میں رہتے۔ ہوئے بولیے۔
ثانيا
یہ رائے مؤرخین کی تو کہی جا سکتی ہے محدثین کی رائے اس کے خلاف ہے اور ظاہر ہے جب بھی حدیث و تاریخ میں تقابل ہو تو رجحان ہمیشہ حدیث ہی کو دی جائے گی اتنی موٹی بات تو تھوڑی بہت سمجھ بوجھ رکھنے والا بھی جانتا ہی ہے۔

محدثین کی رائے

جبکہ محدثین کی تحقیق اور روایات کے مطابق رخصتی کے وقت عمر مبارک 9 سال ہی تھی جیسا کہ بخاری شریف میں ہے

  حَدَّثَنِي  فَرْوَةُ بْنُ أَبِي الْمَغْرَاءِ ، حَدَّثَنَا  عَلِيُّ بْنُ مُسْهِرٍ ، عَنْ  هِشَامٍ ، عَنْ  أَبِيهِ ، عَنْ  عَائِشَةَ  رَضِيَ اللَّهُ عَنْهَا قَالَتْ : تَزَوَّجَنِي النَّبِيُّ صَلَّى اللَّهُ عَلَيْهِ وَسَلَّمَ وَأَنَا بِنْتُ سِتِّ سِنِينَ، فَقَدِمْنَا الْمَدِينَةَ، فَنَزَلْنَا فِي بَنِي الْحَارِثِ بْنِ خَزْرَجٍ فَوُعِكْتُ فَتَمَرَّقَ شَعَرِي، فَوَفَى  جُمَيْمَةً ، فَأَتَتْنِي أُمِّي أُمُّ رُومَانَ وَإِنِّي لَفِي أُرْجُوحَةٍ، وَمَعِي صَوَاحِبُ لِي، فَصَرَخَتْ بِي، فَأَتَيْتُهَا لَا أَدْرِي مَا تُرِيدُ بِي، فَأَخَذَتْ بِيَدِي حَتَّى أَوْقَفَتْنِي عَلَى بَابِ الدَّارِ وَإِنِّي لَأُنْهِجُ حَتَّى سَكَنَ بَعْضُ نَفَسِي، ثُمَّ أَخَذَتْ شَيْئًا مِنْ مَاءٍ، فَمَسَحَتْ بِهِ وَجْهِي وَرَأْسِي، ثُمَّ أَدْخَلَتْنِي الدَّارَ فَإِذَا نِسْوَةٌ مِنَ الْأَنْصَارِ فِي الْبَيْتِ، فَقُلْنَ : عَلَى الْخَيْرِ وَالْبَرَكَةِ، وَعَلَى خَيْرِ طَائِرٍ. فَأَسْلَمَتْنِي إِلَيْهِنَّ، فَأَصْلَحْنَ مِنْ شَأْنِي، فَلَمْ  يَرُعْنِي  إِلَّا رَسُولُ اللَّهِ صَلَّى اللَّهُ عَلَيْهِ وَسَلَّمَ ضُحًى، فَأَسْلَمَتْنِي إِلَيْهِ وَأَنَا يَوْمَئِذٍ بِنْتُ تِسْعِ سِنِينَ

مرفوع | حدیث رقم : 3894 | مجلد رقم: 5 | صفحة رقم: 55

كتاب : مناقب الأنصار - باب : تزويج النّبي عائشة

حضرت عائشہ رضی اللہ عنہا نے بیان کیا کہ نبی کریم صلی اللہ علیہ وسلم سے میرا نکاح جب ہوا تو میری عمر چھ سال کی تھی ، پھر ہم مدینہ (ہجرت کر کے) آئے اور بنی حارث بن خزرج کے یہاں قیام کیا۔ یہاں آکر مجھے بخار چڑھا اوراس کی وجہ سے میرے بال گرنے لگے ۔ پھر مونڈھوں تک خوب بال ہوگئے پھر ایک دن میری والدہ ام رومان رضی اللہ عنہا آئیں ، اس وقت میں اپنی چند سہیلیوں کے ساتھ کھیل رہی تھی انہوں نے مجھے پکارا تو میں حاضر ہو گئی۔ مجھے کچھ معلوم نہیں تھا کہ میرے ساتھ ان کا کیا ارادہ ہے۔آخر انہوں نے میرا ہاتھ پکڑ کر گھر کے دروازہ کے پاس کھڑا کر دیا اور میرا سانس پھولا جارہا تھا۔ تھوڑی دیر میں جب مجھے کچھ سکون ہوا تو انہوں نے تھوڑا سا پانی لے کر میرے منہ اور سر پر پھیرا۔ پھر گھر کے اندر مجھے لے گئیں۔ وہاں انصار کی چند عورتیں موجود تھیں ، جنہوں نے مجھے دیکھ کر دعا دی کہ خیر و برکت اور اچھا نصیب لے کر آئی ہو ، میری ماں نے مجھے انہیں کے حوالہ کر دیا اور انہوں نے میری آرائش کی۔اس کے بعد دن چڑھے اچانک رسول اللہ صلی اللہ علیہ وسلم میرے پاس تشریف لائے اور انہوں نے مجھے آپ کے سپرد کر دیا میری عمر اس وقت نو سال تھی۔

صحیح بخاری حدیث نمبر: 3894

صحیح مسلم حدیث نمبر 3479

سنن ابی داؤد حدیث نمبر 4933

سنن نسائی حدیث نمبر 3380

ابن ماجہ حدیث نمبر 1876

صحاح ستہ کی پانچ کتب میں یہی حدیث مبارکہ آئی ہے کہ رخصتی کے وقت عمر مبارک 9 سال ہی ہے، اور یہی درست بھی ہے لیکن اس پر کم عمری کا اعتراض کرنا در حقیقت اس وقت کے عرف و رواج، بلوغت و صغر پن سے لاعلمی کی وجہ سے ہی کیا جاسکتا ہے کیونکہ تاریخ اسلامی کی کتب میں ایسے بہت واقعات نقل کیے گئے ہیں ، جن سے ثابت ہوتا ہے کہ عرب کے معاشرے میں دس سال کی عمر میں ماں بننا کوئی غیر معمولی بات نہیں تھی اور اس عمر میں نکاح کر نارواج کے مطابق ہی تھا ان لوگوں کے لئے یہ کوئی نئی اور حیرت کی بات نہیں تھی۔

کم سنی میں نکاح کے چند واقعات

ابوعاصم النبیل کہتے ہیں کہ میری والدہ ایک سو دس (110) ہجری میں پیدا ہوئیں اور میں ایک سو بائیس( 122) ہجری میں پیدا ہوا۔

(سیر اعلاالنبلاء جلد 7 رقم 1627) 

یعنی بارہ سال کی عمر میں ان کا بیٹا پیدا ہوا تو ظاہر ہے کہ ان کی والدہ کی شادی دس سے گیارہ سال کی عمر میں ہوئی ہوگی۔
عبداللہ بن عمر و اپنے باپ حجرت عمرو بن عاص رضی اللہ عنہ سے صرف گیارہ سال چھوٹے تھے۔

تذكرة الحفاظ جلد 1ص93

وہی ہشام بن عروہ جنہوں نے حضرت عائشہ صدیقہ رضی اللہ عنہا کے نکاح کی روایت کی ہے انہوں نے فاطمہ بنت منذر سے شادی کی اور بوقت زواج فاطمہ کی عمر نو سال تھی۔

الضعفاء للعقيلى جلد 4رقم 1583، تاریخ بغداد 1/222

(4) عبداللہ بن صالح کہتے ہیں کہ ان کے پڑوس میں ایک عورت نو سال کی عمر میں حاملہ ہوئی اور اس روایت میں یہ بھی درج ہے کہ ایک آدمی نے ان کو بتایا کہ اس کی بیٹی دس سال کی عمر میں حاملہ ہوئی۔

(کامل لابن عدی جلد 5ر تم 1015)

حضرت معاویہ رضی اللہ عنہ نے اپنی بیٹی کی شادی نو سال کی عمر میں عبداللہ بن عامر سے سے کرائی۔

(تاریخ ابن عساکر جلد 70)۔

امام دارقطنی رحمہ اللہ نے ایک واقعہ نقل فرمایا ہے کہ عباد بن عباد المهلبی فرماتے ہیں میں نے ایک عورت کو دیکھا کہ وہ اٹھارہ سال کی عمر میں نانی بن گئی نو سال کی عمر میں اس نے بیٹی کو جنم دیا اور اس کی بیٹی نے بھی نو سال کی عمر میں بچہ جنم دیا۔

(سنن دار قطنی جلد 3 کتاب النکاح رقم 3836 )

نو سال کی عمر میں ماں بننا یہی بتارہا ہے کہ ان کی رخصتی 8 سال کی عمر میں کی گئی تھی۔
اسی طرح امام شافعی رحمہ اللہ کہتے ہیں
میں نے صنعا میں 21 سالہ عورت کو نانی بنے دیکھا ہے، کہ ایک عورت کو 9 سال کی عمر میں حیض آیا اور 10 سال کی عمر میں اس نے ایک بچی کو جنم دیا، پھر یہ بچی بھی 9 سال کی عمر میں جوان ہوئی اور اس نے بھی 10 سالہ عمر میں ایک بچی کو جنم دیا۔

("السنن الکبری" از بیہقی (1 / 319 )

بلکہ خود حضرت عائشہ کی ترمذی شریف میں قول موجود ہے کہ

عائشة أن النبي صلى اللہ علیہ وسلم بنى بها وهي بنت تسع سنين وقد قالت عائشة إذا بلغت الجارية تسع سنين فهي امرأة

جب لڑکی 9 سال کو پہنچ جائے تو وہ عورت ہی ہے

ترمذی حدیث نمبر 1109

اس سے صاف ظاہر ہے کہ عرب میں اس وقت 9 سال کی عمر میں شادی معمول اور عرف کے مطابق تھا ، پھر یہ کہ خود عرب کی گرم آب و ہوا میں عورتوں کے غیر معمولی نشوونما کی صلاحیت ہے لہذا موجودہ دور پر اور وہ بھی عرب کے علاوہ دیگر ملکوں پر اس وقت اور اس علاقے کو قیاس کرنا کسی طور درست نہیں ہے ۔ دوسری بات کہ عام طور پر یہ بھی دیکھا گیا ہے کہ جس طرح ممتاز اشخاص کے دماغی اور ذہنی قوی میں ترقی کی غیر معمولی استعداد ہوتی ہے، اسی طرح قد و قامت میں بھی بالیدگی کی خاص صلاحیت ہوتی ہے۔اس لیے بہت تھوڑی عمر میں وہ قوت حضرت عائشہ صدیقہ رضی اللہ عنہا میں پیدا ہوگئی تھی جو شوہر کے پاس جانے کے لیے ایک عورت میں ضروری ہوتی ہے۔ بلکہ خود حضرت عائشہ فرماتی ہیں کہ میری والدہ میرے جسمانی نشوونما کا خاص اسی غرض کی بنا پر خاص خیال کرتی تھیں بلکہ ٹوٹکے استعمال کرتی تھی تاکہ جلد از جلد میری رخصتی کی جائے۔
ابن ماجہ میں مروی ہے کہ

عن عائشة، قالت: كانت أمي تعالجني يدشنتة، تُريد أن تدخلني على رسول اللہ صلی اللہ علیہ وسلم:

«فما استقام لها ذلك، حتى أكلت القثاء، بالرطب، فسمنت، كأحسن سمنة«

حضرت عائشہ رضی اللہ عنہا سے روایت ہے انھوں نے فرمایا: میری والدہ (ام رومان زینب ) مجھے موٹا کرنے کی تدبیر کیا کرتی تھیں تاکہ میری رخصتی کر کے رسول اللہ ﷺ کی خدمت میں روانہ کریں۔لیکن (کسی تدبیر سے ) یہ مقصد حاصل نہ ہوا حتی کہ میں نے تازہ کھجوروں کے ساتھ ککڑی کھائی تو انتہائی متناسب انداز کی فربہ ہو گئی۔

ابن ماجہ کتاب الاطعمه حدیث نمبر 3324

ایک نکتہ
اس کے ساتھ اس نکتہ کو بھی فراموش نہ کرنا چاہئے کہ حضرت عائشہ رضی اللہ عنہا کو خود ان کی والدہ نے بغیر اس کے کہ آنحضرت ﷺ کی طرف سے رخصتی کا تقاضا کیا گیا ہو، خدمت نبوی ﷺ میں بھیجا تھا اور دنیا جانتی ہے کہ کوئی ماں اپنی بیٹی کی دشمن نہیں ہوتی؛ بلکہ لڑکی زیادہ اپنی ماں ہی کی عزیز اور محبوب ہوتی ہے۔اس لیے ناممکن اور محال ہے کہ انھوں نے ازدواجی تعلقات قائم کرنے کی صلاحیت واہلیت سے ان کی رخصتی کر دی ہو اور اگر تھوڑی دیر کے لیے مان لیا جائے کہ عرب میں عموماً لڑکیاں ۹/ برس میں بالغ نہ ہوتی ہوں تو اس میں حیرت اور تعجب کی کیا بات ہے کہ استثنائی شکل میں طبی اعتبار سے اپنی ٹھوس صحت کے پس منظر میں کوئی لڑکی خلاف عادت ۹/برس ہی میں بالغ ہو جائے، جو ذہن و دماغ منفی سوچ کا عادی بن گئے ہوں اور وہ صرف شکوک و شبہات کے جال بننے کے خوگر ہوں انھیں تو یہ واقعہ جہالت یا تجاہل عارفانہ کے طور پر حیرت انگیز بناکر پیش کرے گا لیکن جو ہر طرح کی ذہنی عصبیت و جانبداری کے خول سے باہر نکل کر عدل و انصاف کے تناظر میں تاریخ کا مطالعہ کرنا چاہتے ہوں وہ جان لیں کہ نہایت مستند طریقہ سے ثابت ہے کہ عرب میں بعض لڑکیاں ۹/ برس میں ماں اور اٹھارہ برس کی عمر میں
نانی بن گئی ہیں۔ جیسا کہ پہلے گذر چکا ہے۔

چھوٹی عمر میں رخصتی کی حکمت

قرآن پاک نے رسول اللہ صلی اللہ علیہ وسلم کی مبارک زندگی کو بہترین نمونه قرار دیا نا صرف مسلمانوں کیلیے بلکہ تمام انسانیت کیلیے حیات مبارک کا ہر ہر پہلو مشعل راہ ہے اور تا قیامت رہنمائی کرتا رہے گا، حضور صلی اللہ علیہ وسلم کی بیرونی اقوال و افعال تو صحابہ کرام ہر وقت دیکھتے اور سنتے تھے، پھر دوسروں تک وہ احادیث پہنچاتے تھے، لیکن اندرون خانہ کا معاملہ مکمل طور پر اس انداز
سے محفوظ کرنے کیلیے کہ رہتی دنیا کیلیے ہدایت و رہنمائی کا سرچشمہ بنے کسی ایسے فرد کا ہونا ضروری تھا جو ان اعمال و اقوال کو محفوظ کرے، تجربہ اور مشاہدہ گواہ ہے کہ ذہنی استعداد کی قوت سیکھنے اور حاصل کرنے کیلیے جو سب سے بہترین عمر ہے وہ یہی 9، 10 سال کی عمر سے لیکر 18 ،20 سال کی عمر ہے اس عمر کے حصے میں انسان کا دماغ خالی لوح کی مانند ہوتا ہے عام طور پر جو چیز اس عمر میں نقش ہو جائے ساری عمر حافظے میں محفوظ رہتی ہے، اس کا مشاہدہ آپ قرآن پاک کے حفظ کرنے کیلیے بچوں کی بہترین عمر یہی ہے اس سے کر سکتے ہیں اور یہی عمر کا حصہ حضرت عائشہ صدیقہ رضی اللہ عنہا نے خدمت نبوی صلی اللہ علیہ وسلم میں گزارا جبکہ دیگر ازواج مطہرات کی عمر میں استفاده و تحصیل سے زیادہ تھی کوئی اور ایسا فرد گھر کے اندر ہونا ضروری تھا جو یہ علوم دینیہ کے خزانے کو محفوظ کر کے دوسروں تک پہنچائے، اور یقینا یہ کام ام المؤمنین عائشہ صدیقہ رضی اللہ عنہا نے بخوبی کیا جس کے نتائج و اثرات واضح طور پر سامنے آۓ چنانچہ

كانت عائشة أفقه الناس وأعلم الناس وأحسن الناس رأيا في العامة» 

(استيعاب على الاصابة: جلد ۴/ ص۲۵۸ ) "

حضرت عائشہ تمام لوگوں میں زیادہ سمجھدار اور سب سے زیادہ علم والی اور عام طور پر نہایت پختہ رائے رکھنے والی تھیں۔

اسی کتاب میں امام ابوالضحی سے مروی ہے کہ حضرت مسروق فرماتے تھے کہ

» رأيت مشيخة من أصحاب رسول الله من الأكابريسئلونها عن الفرائض«

"میں نے آنحضرت صلی اللہ علیہ وسلم کے بڑے بڑے جلیل القدر اصحاب کو دیکھا کہ وہ حضرت عائشہ سے فرائض کے مسائل دریافت کیا کرتے تھے"
ہشام بن عروہ کا بیان ہے کہ میرے والد مکرم فرمایا کرتے تھے

» ما رأيت أحدا أعلم بفقه ولا بطب ولا بشعر من عائشة رضي الله عنها«

" میں نے کسی کو حضرت عائشہ سے زیادہ عالم نہیں پایا۔ فقہ، طب، شعر ان میں سے کسی ایک میں بھی کوئی ان کا ہم پلہ عالم نہ تھا۔"
امام زہری جو صحابہ کرام کے حالات سے بہترین واقفیت رکھنے والے اور علم حدیث اور فقہ کے مسلمہ امام ہیں، ان کا بیان ہے کہ  

لو جمع علم عائشة إلى علم جميع أزواج النبی وعلم جميع النساء لكان علم عائشة أفضل«

"اگر حضرت عائشہ کا علم ایک پلہ میں رکھا جائے اور تمام ازواج مطہرات اور دیگر تمام عورتوں کا دوسرے پلہ میں اور یہ تمام علم سے آراستہ ہو کر آئیں تو پھر بھی حضرت عائشہ ہی کے علم کا پلہ بھاری رہے گا۔"
۔ابو بردہ اپنے والد ابوموسی روایت کرتے ہیں کہ آپ فرماتے تھے

» ما أشكل علينا أمرفسألناعنہ عائشۃإلا وجدناعندھافیہ علما«

"مشکل سے مشکل مسئلہ بھی حضرت عائشہ سے دریافت کیا جاتا تو اس کے متعلق بھی علم کا خزانہ ان کے پاس موجود نظر آتا تھا۔"
حاصل کلام
یہ نکاح مشیت الہی سے ہی ہوا۔
اس وقت عام طور پر اس عمر میں لڑکی بالغ ہو جاتی تھی۔
اس عمر میں نکاح عرب کے عرف و رواج کے مطابق تھا۔
یہ رخصتی نبی کریم ﷺ کے تقاضہ کے بغیر والدین عائشہ صدیقہ رضی اللہ عنہا کی مرضی کے مطابق ہوا۔
اصل حکمت دین کی ترویج تھی جس کا فائدہ تا صبح قیامت جاری رہے گا۔

سیدہ عائشہ صدیقہؓ کا نبی کریمﷺ سے بابرکت نکاح (بوقت نکاح سیدہ عائشہ صدیقہؓ کی عمر کتنی تھی؟ تحقیق)