جواب

رَبِّ اشْرَحْ لِیْ صَدْرِیْ وَ یَسِّرْ لِیْۤ اَمْرِیْ وَاحْلُلْ عُقْدَةً مِنْ لّسَانِیْ یَفْقَهُوْا قَوْلِیْ

 اس سوال کے جواب میں عرض ہے کہ

¹-اس معجزہ کو قبول کرنے میں دشواری محسوس کرنے کی جو دونوں وجوہات بیان کی گئی ہیں وہ نہایت قابلِ توجہ ہیں یعنی یہ کہ

 اہلِ تشیع اس حدیث کو نہیں مانتے

 اہلِ قرآن اور منکرین بھی اس حدیث کو نہیں مانتے

 تو گویا اس معجزہ کو قبول کرنے میں دشواری محسوس کرنا ان گروہوں سے مشابہت اختیار کرنا ہے۔

اس سلسلہ میں نبی کریم ﷺ کی امت کو جو ہدایات ہیں وہ اس حدیث پاک کی روشنی میں ملاحظہ کی جا سکتی ہیں۔

وعن ابن عمر رضي الله عنهما قال: قال رسول الله صلى الله عليه وآله وسلم: ‏‏‏‏من تشبه بقوم فهو منهم ‏‏‏‏

 اخرجه ابو داود وصححه ابن حبان.

ترجمہ: حضور ﷺ کا ارشاد ہے: جس شخص نے کسی قوم کی مشابہت اختیار کی تو وہ شخص اسی قوم میں شمار ہوگا۔

پس اس معجزہ پیغمبر ﷺ کو قبول کرنے میں دشواری محسوس کرنا اہلِ تشیع اور منکرینِ حدیث سے مشابہت کے باعث واجب الترک ہے ناکہ باعثِ اشکال۔

یعنی یہ مشابہت ہی اس بات کی طرف داعی ہے کہ اس اشکال اور اعتراض کو اپنے دماغ سے نکال دینا چاہیئے اور اپنی اصلاح کرنی چاہیے۔

²-سوال میں بھی یہ بات درج ہے اور امر واقعہ بھی یہ ہے کہ معجزات عقل کی کسوٹی پر پرکھی جانے والی چیز نہیں ہے بلکہ خالصتاً اللہ تعالیٰ کی طرف سے خرق عادت طور پر عطا ہونے والی نعمت اور دلیل نبوت ہے جس کو عقل کی بنیاد پر پرکھا یا سمجھا نہیں جا سکتا ہے۔

 پس اس معاملے میں عقل کو اہمیت نہیں دینی چاہیے اور نقل ہی پر ہی اعتماد کرتے ہوئے اس پر ایمان لانا چاہیے۔

³-سوال میں ایک خطرناک بات یہ لکھی گئی ہے کہ بلاضرورت معجزات پر نظر ثانی ہونی چاہیئے 

جس معجزے کو یہاں بلا ضرورت سمجھا گیا ہے اس کو بلا ضرورت سمجھنے کی دلیل کیا ہے؟

 کیا محض عقلی بنیاد پر کسی معجزے کو بلا ضرورت اور کسی کو ضرورت قرار دینا جائز ہے؟

 یہ ایک ناقابلِ انکار حقیقت ہے کہ اللہ تعالیٰ نے جتنے لوگوں کو عقل عطا فرمائی ہے وہ برابر نہیں بلکہ کچھ لوگوں کی عقل بہت تیز ہوتی ہے اور کچھ لوگوں کی کمزور پس کچھ لوگوں کی عقل میں کوئی معجزہ بلاضرورت اور دوسرے بعض لوگوں کی عقل میں وہی معجزہ ضرورت سمجھا جائے گا تو کیا کسی کو یہ حق دیا جا سکے گا کہ جس کی عقل میں کوئی معجزہ نہیں آتا وہ اسے بلا ضرورت قرار دے کر اس کا انکار کر دے؟ ہرگز نہیں بلکہ یہ نظر و فکرِ دین کے لیے نہایت نقصان دہ ہے۔

⁴-دین کی مسلمات میں سے ہے کہ دین عقل کے تابع نہیں بلکہ عقل دین کے تابع ہے۔

 پس یہاں پر بھی یہ جو اشکال پیدا ہوا ہے یہ محض عقل کی بنیاد پر پیدا ہوا ہے لہٰذا عقل کی اتباع کرنے کی بجائے جو نبی کریم ﷺ کے پاکیزہ ارشاد سے ثابت ہے اس کو مان لینا اور اس پر ایمان لے آنا چاہیے اسی میں خیر ہے اور اسی میں نفع ہے۔

 ⁵-سائل نے نظر ثانی کا جو مشورہ دیا ہے کہ نظر ثانی ہونی چاہیے سوال یہ ہے کہ اللہ کے دین میں نظر ثانی کا اختیار کس کو حاصل ہے؟

شق صدر کا معجزہ احادیث میں بیان ہوا ہے جس کی بنیاد سورۃ الم نشرح کی پہلی آیت ہے۔

تو کیا رسول اللہ ﷺ کے ارشادات کو منسوخ کرنے یا نظر ثانی کے ذریعے تبدیل کرنے کا کسی انسان کو اختیار حاصل ہے؟

 یقیناً کسی کو اس کا اختیار حاصل نہیں۔

تو پھر نظر ثانی کا کیا مطلب ؟

بہرحال یہ ایک خطرناک فکر و نظر ہے اور اس کی وجہ سے دین کے بہت سارے مسائل اور عقائد متزلزل ہو جائیں گے جنت اور جہنم وغیرہ تمام چیزیں عقل سے ماورا ہیں اور ان پر نقل کی بنیاد پر ہی ایمان لانا ضروری ہے لہٰذا اس فکر و نظر کو اور اہلِ تشیع وغیرہ باطل ادیان کی مشابہت کو چھوڑ نقل سے ثابت دین حق کو اختیار کرنا چاہیے خیر اور بھلائی کا یہی راستہ ہے۔