جواب 

اول ذہن نشین کر لیں کہ شعبِ ابی طالب میں محصور ہونے کا بنیادی سبب نبی کریمﷺ سے ان کے خاندان کی حمایت کو ختم کرنا تھا یعنی اس مقاطعہ کا پس منظر یہ تھا کہ مشرکین مکہ ابو طالب کو اور ان کے خاندان کو بار بار یہ کہہ رہے تھے کہ یا تو آپ محمدﷺ کو ان کی دعوت سے روکے اور یا پھر ان کو ہمارے حوالے کر دیں مگر نبی کریمﷺ کا خاندان اس بات پر امادہ نہیں ہوا جس کی بنیاد پر انہوں نے خاندانی بنیاد پر بنو ہاشم اور بنو عبدالمطلب سے تعلقات ختم کر دیے اصل باعث یہ نہیں تھا کہ جو لوگ مسلمان ہو چکے ہیں ان سے مقاطعہ کیا جائے ان سے تعلقات ختم کیے جائیں اگر یہ بنیاد ہوتی کہ جتنے لوگ مسلمان ہو چکے ہیں ان سے تعلقات ختم کر دیے جائیں پھر تو یہ سوال بنتا تھا کہ یہاں پر کون کون سے صحابہ کرامؓ محصور ہوئے اور کون کون سے وہ صحابہؓ تھے جنہوں نے محصوری کی اس زندگی کو قبول نہیں کیا۔

اب چونکہ معاملہ یہاں خاندانی بنیاد پر تھا یہی وجہ ہے کہ شعبِ ابی طالب میں پناہ لینے والے بنو ہاشم اور بنو عبدالمطلب کے مؤمن بھی تھے اور کافر بھی تھے ان میں سیدنا سعد بن ابی وقاص رضی اللہ عنہ بھی تھے اور سیدنا علیؓ بھی تھے اور خاندان کے دیگر وہ حضرات جو مسلمان ہو چکے وہ بھی تھے البتہ بنو ہاشم کے علاوہ جتنے حضرات نے ایمان قبول کر لیا تھا چونکہ ان سے مقاطعہ کا اعلان ہی نہیں تھا اس لیے براہِ راست وہ متاثر نہیں ہوئے لیکن اس کا یہ معنیٰ نہیں ہے کہ محصوری کے ان ایام میں وہ خاموش بیٹھے رہے بلکہ سیدنا ابوبکر صدیقؓ اور سیدنا عمر فاروقؓ سمیت اہلِ ایمان اور بہت سارے وہ لوگ جو اس وقت تک مسلمان بھی نہیں ہوئے تھے مگر اس حرکت کو ظالمانہ حرکت سمجھتے تھے وہ مسلسل اس ظالمانہ فیصلہ کو ختم کروانے کی کوشش کرتے رہے اور پس پردہ کھانے پینے کی اشیاء شعبِ ابی طالب میں پہنچاتے رہے۔