جواب:

سیدنا ابو ہریرہؓ اور سیدنا ابوالدرداءؓ کی سیدنا عبدالرحمٰن بن غنمؓ سے یہ ملاقات بے شک بعض مؤرخین نے نقل کی ہے لیکن یہ صحیح نہیں عویمر بن عامر ابو الدرداءؓ کا اس سے بہت پہلے دورِ عثمانی میں انتقال ہوچکا تھا آپ نے سیدنا علیؓ اور سیدنا امیرِ معاویہؓ کے اختلاف کا دور نہیں پایا حافظ ابنِ عبدالبر الاستیعاب میں لکھتے ہیں کہ گو بعض اہلِ اخبار نے کہا ہے کہ سیدنا ابوالدرداءؓ جنگِ صفین کے بعد فوت ہوئے لیکن صحیح یہ ہے کہ آپ نے سیدنا عثمانؓ کے دورِ خلافت میں وفات پائی۔

وللاكثر والأشهر والاصح عند اهل الحديث انه توفى فی خلافة عثمانؓ بعد ان ولاه معاويةؓ قضاء دمشق۔(الاستیعاب جلد 3 صفحہ 17)۔

*ترجمہ:* اکثر اور زیادہ مشہور اور زیادہ صحیح بات محدثین کے نزدیک یہ ہے کہ آپ نے خلافت عثمانی میں وفات پائی بعد اس کے کہ انہیں سیدنا امیرِ معاویہؓ نے دمشق میں قاضی مقرر کیا ہوا تھا ابنِ اثیر جزری بھی لکھتے ہیں:

ان ابا الدرداءؓ تقدمت وفات من الوقت الذی بويع فيه علىؓ فی اصح الاقوال۔ 

(اسد الغابہ جلد 3 صفحہ 319)۔

ترجمہ: زیادہ صحیح قول یہ ہے کہ سیدنا ابو الدرداءؓ کا انتقال اس سے پہلے ہوچکا تھا جب سیدنا علیؓ کے لیے بیعتِ خلافت کی گئی تھی۔

حافظ ابنِ حجر عسقلانی نے بھی تہذیب التہذیب جلد 8 صفحہ 172 پر عویمر بن عامر ابو الدرداءؓ کے ترجمہ میں آپ کا سنِ وفات 33 ھ لکھا ہے سو یہ قصہ ہی غلط ہے کہ ان تین صحابہ کرام رضوان اللہ علیہم اجمعین نے سیدنا امیرِ معاویہؓ کو خلافت کے لاںٔق نہیں سمجھا تھا اس مسئلے میں سیدنا حسنؓ کی رائے بالکل صحیح ہے اور لسانِ رسالت سے بھی اس کی تائید موجود ہے آپ نے فرمایا الله تعالیٰ میرے اس بیٹے سیدنا حسنؓ کے ذریعہ میری اس امت کے دو عظیم گروہوں میں میں صلح کراۓ گا سیدنا حسینؓ بھی اس مسںٔلہ میں سیدنا حسنؓ کے ساتھ تھے سو سیدنا امیرِ معاویہؓ پر اس مفروضہ واقعہ سے کسی قسم کا اعتراض کرنا ہرگز درست نہیں ہے۔ 

کتبہ خالد محمود عفا الله عنہ۔