جہاد میں شرکت

صفہ کے طلبائے کرامؓ نے اپنے آپ کو صرف علمِ دین سیکھنے اور عبادت کرنے ہی تک محدود نہیں کر رکھا تھا بلکہ مسلمانوں کے اجتماعی کاموں اور میدانِ کار زار میں بھی بڑھ چڑھ کر حصہ لیتے تھے۔ اور میدانِ جہاد میں بڑے بڑے کارنامے انجام دیتے تھے۔ حقیقت یہ ہے کہ دین کے عالم، رات کے راہب اور دن کے شہ سوار تھے۔ کتنے ہی اصحابِ صفہؓ میدانِ کارزار میں شہید ہوئے۔ نمونۂ از خروارے کے طور پر چند اسمائے گرامی پیش کیے جارہے ہیں۔ حضرت صفوان بن بیضاءؓ، خریمؓ بن فاتک، خبیبؓ بن یساف، سالم بن عمیرؓ اور حارثہ بن نعمانؓ غزوۂ بدرمیں جامِ شہادت نوش کئے۔

(الحلیۃ:356۔371۔363۔364۔367۔373 جلد1)

غزوۂ احد میں حضرت حنظلہؓ شہید ہوئے۔ (الحلیۃ:صفحہ357،جلد1) جنہیں فرشتوں نے غسل دیا۔ غزوۂ خیبر میں حضرت ثقف بن عمرو (الحلیۃ:صفحہ352،جلد1) غزوہ تبوک میں حضرت عبداللّٰہ ذُوالبجادینؓ اور جنگِ یمامہ میں حضرت عمر فاروقؓ کے بھائی زید بن خطابؓ اور حضرت سالم مولیٰ ابوحذیفہؓ شہید ہوئے۔

(الحلیۃ: صفحہ370،367،356 جلد1۔ ایک مد 800 گرام یا 500 گرام اور 32 ملی گرام ہوتا ہے)